طريقة عمل المعمول السوري الفاخر

المعمول السوري الفاخر :
نصف كيلو دقيق
ربع كيلو سمنة بلدى او البقرة الحلوب او زبدة ساخنة
بس يفضل السمنة بلدى
نص معلقة كبيرة بيكنج بودر
نص معلقة صغيرة محلب ده موجود عند العطار
معلقتين كبيرة سكر
لبن للعجن حوالى نصف كوب
فانيليا باكو
الحشو :
تمر منزوع النوى و مهروس مع معلقة كبيرة سمنة و معلقة صغيرة قرفة و ممكن بدون قرفة ( عجوة )
بصوا لو السمنة مش عارفين وزنها
انا عملت ال3 كوبايات دقيق عليهم كوباية و نص سمنة سايحة مقدوحة يعنى
المحلب ده جبت ب 2 جنيه من العطار بس استعملت منه نص معلقة صغيرة و حيتبقى منه ل 4 او 5 مرات
الطريقة بئة :
نحط عالدقيق البيكنج بودر و المحلب و الفانيليا و السكر ة نقلب بالمعلقة
نضيف السمنة تكون سخنة و بعدين اللبن و نعجن مش كتير
يادوبك نلم العجينة
نسيبها ترتاح ساعة
نبدأ نشكلها و نحضر الحشوة
العجوة او التمر نخليه كور و تبقى كبيرة شوية
نفرد من العجينة حتة على ايدينا و نحط العجوة ف النص و نقفل
و نحاول ما تبقاش فيها تشققات 👍👍👍
نرصها ف صينية مدهونة زيت و تسيبها ربع ساعة قبل ما ندخلها الفرن كدة مش حتشقق
ندخلها فرن سخن من قبلها على 200 درجة الرف الاوسط
بتاخد ربع ساعة بالظبط حتلاقيها احمرت من تحت
شغلى الشواية تاخد لون من فوق خفيف كدة
طلعيها بئة و استمتعى